Kaapstad
’n Eietydse Kaapse hiphopera wat die storie van Afrikaans in
die 1600’s gaan haal, ’n multidissiplinêre
gemeenskapsopera wat in taxi’s afspeel en geskep is
deur 20 jong studente van Soweto, asook gereelde besoeke van
Nederland se voorste klassiekemusici, jazzers en teaterlui om hul
vaardighede hier in te ploeg, is die jongste wisselwerking tussen
Suid-Afrika en Nederland.
Die omvangryke projek staan as Interaksie SA-NL bekend en het
eintlik informeel verlede jaar al begin met die sterk Nederlandse
betrokkenheid by die KKNK. Dit behels benewens die gereelde besoek
van Nederlandse musiek-, dans- en teatergroepe aan Suid-Afrika ook
’n uitgebreide program van slypskole, lesings en
meesterklasse deur Nederlandse kunstenaars. Die kunstenaars gaan
met jong Suid-Afrikaanse talent werk, maar ook met Suid-Afrika se
voorste kunstenaars en geselskappe om grensverskuiwende produksies
die lig te laat sien.
Vennote sluit onder meer in die Melody-musieksentrum in Soweto,
Mike van Graan, die Ipelegeng-gemeenskapsentrum in Soweto, die
Markteater en die Kaapse Filharmoniese Orkes.
Die doel van die projek is die daarstelling van innoverende
teater-, dans- en musikale produksies wat deur die Suid-Afrikaanse
kultuur geïnspireer is.
Die produksies sal op verskeie feeste, sale en teaters in
Suid-Afrika opgevoer word, waaronder op Infecting the City, KKNK,
die Nasionale Kunstefees in Grahamstad, opvoerings in die
Baxter-teater, die Markteater in Johannesburg, die
Voorkamerfees in Darling en die Oppikoppi-fees.
- Die eerste groot ko-produksie is die hiphopera Afrikaaps wat
van 1 tot 4 April op die KKNK en van 7 tot 25 April in die
Baxter-teater in Kaapstad opgevoer word.
Die produksie, wat die wortels van Afrikaans naspeur, smee die
talente van die hiphop-digter en kunstenaar Jitsvinger, die digter
Blaq Pearl en die jazzpianis Kyle Sheperd saam. Dit sal afspeel in
’n digitale landskap en die musiekstyle en genres sal
oorkruis. Benewens hiphop sal Kaapse style soos ghoema en die
musiek van die Kaapse Klopse ook gehoor word.
Die dramaturg is Aryan Kaganof en die regisseur is Catherine
Henegan, medestigter van The Glasshouse in Amsterdam.
- Die Nederlandse kunstenaar Ibrahim Quraishi neem deel aan die
produksies Meet Market, wat nog môre om 12:00 as deel van die
openbare kunsfees Infecting the City opgevoer word.
- Once Upon a Time the World was Round is ’n
gemeenskapsopera wat sy première op die Nasionale
kunstefees in Grahamstad sal hê en volgende jaar by die
internasionale Yo! Operafees in Utrecht opgevoer gaan word.
Toevallige ontmoetings in ’n minibustaxi en die interaksie
tussen passasiers is die verhaallyn van die opera. Die opera is
ontwikkel uit teater- en musiekslypskole.
- Daar is ook noue samewerking op jazzterrein met die besoek van
die Nederlandse musikante Peter Guidi, Eric Vloeimans en David de
Marez Oyens, en samewerking wat klassieke en kontemporêre
musiek betref, met in die vooruitsig besoeke van die akkordion-duo
Toeac, die stemensemble Wishful Singing, Utrecht se Barokensemble,
die pianis Ralph van Raat en die dirigente Arjan Tien en
Conrad van Alphen. Wat popmusiek betref is daar reeds nou
samewerking tussen die Oppikoppi-fees en Nederland.
Besoek ook
|